المحاضرة معها كأننا بمعسكر شديدة بشكل يضايق وطول الوقت احس اني متوترة وش بتقول ولا تقوم فجأة لانها تحرج البنت اسلوبها مره شين مع البنات الا الي تحبهم بس اما الباقي الله يصبركم
كنت أشيل هم محاضرتها اخاف اتأخر والا انسى اللابكوتلكن الحق يقال اذا انتي تخصصك احياء والله مرة بتفيدك، دقتها وخبرتها وعطاؤها، تخليك كأنك متخصصة من سنين ممكن لو خذتي مع غيرها بتريحين راسك لكن الشهادة لله بتفوتين على نفسك علم كثير وخبرة مشكلتها تميز بين الطالبات احيانًا بس ما تضرك شخصيًا، وعطتني كامل كنت اكرهها، بس قبل فاينل العملي صدمت وقبل الاختبار بدقيقة جابت رقمي من البنات ودقت علي وينك؟ وقت لها وقامت تسمي علي ويوم وصلت قالت لا تبدين اختبارك الا اذا هديتي ولو ما تقدرين عادي، الله يسعدها
لا ترتاعون اذا جتكم، اذا عرفتوا لها بتسلك أموركم، كونوا محترمين معها ومنضبطين وإن شاء الله بيمشي الوضت بسلاسة، ولو تقدرون تغيرونها افضل التحضير كانت تحضر قبل وقت المحاضرة، واذا تأخرتي دقيقتين بتاكلين تهزيئة واذا تأخرتي ٥ دقايق غياب وبدون نقاش فحاولوا ما تتأخرون وخلاص حتى واحنا حاسب كانت تدقق علينا كأننا متخصصين كانت مسببة لي رعب الصدق ومستحيل تمشّي لي، شرحها حلو تشرح من قلب وتعيد وتزيد بس لا تقاطعونها بتفصل عليكم، تشخصنها واجد وتفرّق بين البنات، اذا حبتك حبتك واذا حطتك براسها راحت عليك
اسلوبها منفرررر ولا الباقي ترا عادي ماتظلم يعني بس اسلوبها وتعاملها مره شين ولا تقدر ظروف الناس وتفاوت مستويات الفهم!
بالنسبه لي اشوف شرحها واضح ومانقصت عندها الا بالفاينل يعني المشكله من مذاكرتي مو منها اسلوبها شوي شديد والوقت مهم عندها مره مره بالدقيقه بالحضور والتسليم بس محترمه وتحب تخصصها وتثريكم بمعلومات عنه👍🏼
الصراحه مره تجنن ابدا مو مثل الكلام الي عنها ممكن اسلوبها صعب بس اذا انتم محترمين تحترمكم ما تحب احد يعترض على ولا شي اذا ما اعترضتوا عطتكم حقكم وزيادة متفاهمه مره وتراعي في الشغل بس التحضير خلوكم قبلها في المعمل لانه يهمها مره احضروا قبل الوقت ولا تتكلمون كثير وبترتاحووووون
للامانة سب البنات لها مجحف حقها مره!! أفضل بكثير مما تظنون وعسولة وطيبة . صراحة لو بيرجع الزمن فيني بأخذها وانا مغمضة بس نصيحتي الوحيدة سووا شغلكم واللي عليكم بدون نقصان وبتعجبكم الدرجة ان شاء الله . عطتنا كلنا كامل وما ظلمت احد فينا . شديدة بالحضور والوقت احرصوا تكونون بالوقت موجودين .
التقييم بدون تعليق
شديدة في الحضور صارمة في التعامل شرحها جيد نوعًا ما وماتخوف زي مايقولون البنات
اول لاب مرا صارمه وشديده واي احد يدخل بعدها تطرده باسلوب جدا محرج لكن اذا اثبت وجودك معها بالحضور والمشاركات والاداء العملي راح تحبك مره وتميزك عن البقيه درست عندها مادتين وما لقيت منها الا كل خير الله يجزاها كل خير